-- هذه الحكاية صرات يالشيخ في 1881 و ذكرها مؤرخين ياسر..والقائد الفرنسي الذي تم قتله مسموما الليلة هذيك اسمه كومندان فلاترس. وفرنسا بسبب هذيك الضربة ما زادتش جات حتى ل 1889
-- يعني فرنسا و ما أدراك ما زادتش دارت في المنطقة لمدة 8 سنين؟
--إيه يالشيخ ...وين تجي؟ كانت تحضر نفسها لكننا كنا نعرف الصحراء...يعني تجي في مارس والا أفريل فترة الزوابع الرملية تنتحر. من بعد ماي السخانة ياسر حتى لأكتوبر. في أكتوبر نتحركوا احنا في الصحراء ما تلقاناش.
-- يا ودي بركا ما تخرط عليه. ماشي الشيخ امود أغ المختار القايد تاعكم هرب و خلاها؟
-- إيه ..شافكم انتم العرب تحاربوا مع فرنسا ما قدر يقاوم على جيهتين...راح الى توارق ليبيا و حارب معاهم حتى مات في 1928.
-- هذاك اللي مسمية عليه ثانوية تامنراست؟
-- إيه هو يالشيخ ...مجاهد كبير ..الله يرحمه.
-- قلت لي يا حميدة التوارق داروا غلطة كبيرة ..واش هي هذه الغلطة؟ حاربوا فرنسا؟
-- أبدًا يالشيخ. الغلطة هي أنهم ما قبلوش بالاستعمار الفرنسي و رفضوا يبعثوا اولادهم يقراو في المدارس الفرنسية كيما داروا العرب و الحراطين.
-- آش باغي تقول علينا أحنا؟ احنا قبلنا بفرنسا؟
-- التوارق ما قبلوش يتعلموا لغة الفرنسيين...خافوا على لغتهم و تقاليدهم ...من بعد الاستقلال الادارة الجزائرية خدّمت اللي قراو عند فرنسا و خلات اللي ما قبلوش يتعلموا لغتها.
-- آش يخدموا بيكم انتم؟ آش تعرفوا تخدموا أنتم ؟ما قريتوا ما تفهموا ما تخدموا..
استشاط حميدة غضبا من كلام صديقه العربي و كاد يوقف السيارة لولا أن منعته. أما العربي فقد كان يضحك من كلام السائق و يطلب مني أن لا أصدق كلامه فكله ترهات و خرافات.
-- بالاك تامنه يالشيخ هذو مساكن التوارق فاتت عليهم الحضارة و خلاهم متخلفين علينا . تصور يالشيخ مرحاض ما عندهمش في دارهم.
-- ما عندناش و مانديروهش في دارنا. احنا شعب نظيف وما يقبلش الخماج حاشاك يالشيخ داخل الدار.
-- هذه ثقافة و كل واحد ينظر للنظافة بطريقته الخاصة. يعني في رايك رفض تعليم ابنائكم في المدارس غلطة كبيرة للتوارق؟
-- طبعا يالشيخ...لوكان علّمنا اولادنا في المدراس لو كان استفدنا أكثر من دولتنا.. روح شوف الادارات في تامنراست و عين صالح. شكون اللي حاكمينها؟ غير اللي جاؤوا من الشمال و العرب و الحراطين.
-- هكذا نفهم يا حميدة بلي ندمتوا على فرصة كبيرة.
-- هذيك هي يالشيخ. كنا أسياد الصحراء فأصبحنا في ذيل الترتيب في المجتمع. قاع يضحكوا علينا لأننا لم نتعلم في المدارس و حافظنا على ثقافتنا.
-- يعني لو كان تعلمتم كنتم ستصبحون أفضل؟
--مكاش كيما القراية يالشيخ. لو كنت قاري كنت فتحت وكالة سياحية و نستقبل السياح من جميع الدول و نكري سيارات و نبني اوتيلات و نخلص غير بالدوفيز.
-- عندك ابنك خرج من الجامعة. يقدر يعاونك.
--ما شي ساهلة يالشيخ . اللقب نتاعه تارقي..يحقروه..قلت نفتح له وكالة سياحية الخدمة نقصت ياسر...لاسواح و لاهم يحزنون..هو درس تجارة غير باش يفتح وكالة ..الوكالات كلها لأصحاب الشمال. هلكنا الارهاب الله لا تربحه.
-- والله كاينة...اول مرة جيت لتامنراست في 1991. والله كانت تغلي بالسياح.
-- يا حسراه يالشيخ ...والله في السمانة كنت نصور ما شاء الله..شريت زوج سيارات و دار في تامنراست و زدت تزوجت.
كنت ندي فوج من تامنراست لقمة أسكريم و نرجعهم لتامنراسث نصور قد ما نصور في شهرين.
آو..ما لاكنت تضرب على الراس؟
--لا يالشيخ... كنت نعرف نخدم. نخلص غير بالدوفيز...نشري من عند السواح القش و نعاود نبيعه.
-- اسمح لي يا حميدة...راك كارثة يا صاحبي انت رجل اعمال من الكبار.
هنا توقف احميدة عن الكلام بعد ان نال اعترافا كان يبحث عنه و خرج عن الطريق ليتوقف قائلا :
-- والله يا شيخ تستاهل كاسة تاي من النوع الرفيع...ننزل هنا قاع و نديروا فيها قصرة عمركم ما تنساوها. هنا عين امقل. نكنيظ امويت ايالله...الحمد لله بالتارقية يالشيخ.
ليست هناك تعليقات:
إرسال تعليق