انطلقت بنا السيارة مجددا بعد أن نال السائق احميدة قسطه من الراحة. سألته كم مرة يعبر هذا الطريق في الاسبوع فأجابني بانه أحيانا يقطعه 3 مرات في الاسبوع و يرتاح يوما فقط في الاسبوع. -- أحيانا يالشيخ والله ما نرتاح.. تحتاجني السلطات نحوس بزوار الولاية من الرسميين و الدبلوماسيين فالصحراء نخدم ما نحبسش.
-- و علاش يختاروك انت بالذات؟
-- في حياتي مادرتش حادث مرور و اعرف مسالك الصحراء كلها. يعني تركب معايا ما تضيعش في الصحراء يالشيخ.
-- اشحال وانت تخدم هكذا ؟
-- أكثر من 18 سنة.
-- الله يبارك.
--أنا نسعى على زوج عائلات . واحدة في تامنرست و واحدة في عين صالح.
هنا استيقظ صاحبه العربي فجاة ليؤكد ما قاله معاتبا أياه على تسببه في أزمة ديموغرافية للبلد.
-- هذا يالشيخ راه عنده 12 طفلا. خمسة في تامنراست و سبعة في عين صالح.
-- قل الله يبارك يا صاحبي. ما خصني غير انت تحسدني.
-- ما ني حاسدك يا ودي- يقصد يا ولدي- ربي يزيدك ان شاء الله. ياك انت تحب الوليدات.
-- إيه...ربي انعم علي بيهم ...الحمد لله...واحد راه بالاك يقرا عندك يالشيخ.
-- ما اعرف ..واش نقمته ؟
-- أق الساهلي
-- ما تقوليش هذاك ولدك؟
-- إيه ولدي..الشيخ اتهلا فيه ربي يهنيك.
أردت ان اخبره ان إبنه عبارة عن كارثة بشرية فهو لا علاقة له باللغات الاجنبية وانه لا فائدة ترتجى منه ولكني تراجعت حتى لا أفسدعليه الرحلة.
-- عندي سبعة يقراو ..واحد كمل قرايته و اربعة ما زالوا صغار.
-- الله يبارك...ربي يحفظهم لك.
-- اللهم أمين..آمين..أحنا التوارق يالشيخ غلطنا غلطة كبيرة و رانا نخلصوا فيها. راك فاهمني يالشيخ.
-- لا سامحني....هنا والله ما فهمتك. واش من غلطة.
--شوف يالشيخ..احنا التوارق كنا أسياد الصحراء ...هكذا يقولوا علينا
-- و ما زلتم أسياد الصحراء.
-- لا..راك تقمبر بيا الشيخ.
هنا تدخل صاحبه العربي مستهزءا.
--أسياد الصحراء ؟ من وقتاش ؟ نحن العرب أسيادها.
-- أنتم العرب لم تحاربوا فرنسا كما فعلنا نحن. الشيخ أمود و تينهينان يشهدوا علينا. تعرف قصة الكتيبة الفرنسية اللي قضى عليها التوارق في ليلة واحدة؟
-- هذي و الله ما نعرفها...وقتاش صرات؟
-- هذه يااشيخ حكاوهنا اجدودنا ..جاءت كتيبة فرنسية في القرن اللي فات حبّت تستعمر الجنوب..بعث قائد الكتيبة مبعوثا فرنسيا لزعيم قبيلتنا ناحيةعين صالح و طلب منه تسليم المنطقة دون قتال على ان يحفظ للاهالي حقوقهم و أملاكهم.
--عربيتك جميلة يا أحميدة..
-- شكرا...هذه قصة حفظتها هكذا.
هيه..كمل الحكاية .
إيه ...قلت لك رحب زعيم قبيلة التوارق بالمبعوث الفرنسي و اتفقوا على تسليم المدينة بدون قتال.
-- هيه هيه ..و يقول لك أسياد الصحراء. كيفاش أسياد الصحراء و انت تقول استسلم بلا قتال بلا جد ماليكم؟
--ما كملت الحكاية...اصبر علي شوية...إيه كيما قلت لك يالشيخ اتفاهموا غدوة من ذاك يجي الفرنسيون و يدخلون بلا مشكل. لكن الزعيم الترقي طلب منهم قبول دعوة للعشاء على شرف الكتيبة بأكملها..قال له أن التوارق يكرمون الضيف و هذا من شيمهم.
-- هيه هيه هيه...استسلام و وزيد عشاء من فوق..قالك أسياد الصحراء. هيه هيه..
--يا ودي اصبر ما تقاطعنيش. غدوة من ذاك جاءت الكتيبة ب350 فرد..كما وعد مبعوثها ... استقبلهم زعماء القبيلة و نصبوا لهم الخيام و بدات النسوة في تحضير وليمة العشاء. على بالك الشيخ ..لم يبق من الكتيبة الا حوالي 40 فرد..تم القضاء عليهم بالسيوف.
-- و الباقي؟ 310؟
-- هاذوك يالشيخ تعشوا الكسكسي ...حطينالهم حشيشة يسموها الهبّالة...حشيشة سامة تنبت في الصحراء...حتى البعير ياكل منها يموت...حطيناها طابت مع اللحم. والله تقدر تلقاها في الكتب تاع فرنسا..مذكورة الحكاية .
ليست هناك تعليقات:
إرسال تعليق