أعذار

لا أدري لماذا مكثنا كل ذلك الوقت في ذلك المكان. بدأ الشك يتسرب الى نفس و شعرت أن حميدة كان ينتظرذلك الوفد العسكري حتى يأتي أو أنه يتعامل معهم خوفا أو طمعا. بدأت تباشير الصبح تظهر في سماء تلك البقعة الموحشة من الصحراء مع خيوط من ضوء الشمس سطعت من وراء تلك  الجبال السود المحيطة بنا. ذهب عسكريان الى سيارتهم بعد ان أمرهم قائدهم الميلي بذلك.  لقد كان العساكر في غاية الكرم حيث أحضروا كيسا ملآه جبنا و لحما محفوظا في علب معدنية خضراء إضافة الى قطع من الخبز تشير الى انه طعام العسكر. 
-- تفضلوا بسم الله ...هذا فروماج من النوع الأرجنتيني الفاخر. وهذا كورند ميت...والله هايل.
-- وخيارت بيكم حضرات...والله نشتهي الفرماج تاع العسكر ..زيدني وحدة حضرات.
   فرح احميدة بهدية العسكر و لم يكتف بواحدة فكان الضابط سخيا معه. فمنحه خمس علب و زاده مثلها من اللحم البقري المحفوظ.
-- كلهم  في الطريق و بالك يشدوك بيهم تقول لهم شكون اعطاها لك. 
-- والو حضرات..انا نموت على الفرماج هذا. والله ما وصل لتمنراست. .
-- قل لي يا حميدة..هذا القاوري اللي معكم ما شربش في الطريق.
-- والو حضرات..كان راقد طول الطريق. ما شفتوا جبد حاجة ..راه غير يتكيف.
-- استاذنا ..على بالك  بلي الفروماج و الكاممبير يلزمك تفرّش لهم؟
-- والله ما فهمتك خويا.
   نظرالعساكر الى بعضهم في تعجب أيقنت ان اجابتي على سؤال القائد هي سبب تعجبهم. كان الدركي العنابي أجرأهم حيث ضحك ثم توقف بعد ان رمقه الميلي بنظرة حادة.
-- استاذ ..الفرماج و الكاممبير لازملوا حاجة تشربها قبل ما تاكلهم باش تزيد البنة.
-- لا هذه ما نعرفهاش و عمري ما سمعت بها.
-- والو يا حضرات. الشيخ خاطيه الصوالح هذه.
-- واش من صوالح ياحميدة؟
-- شوف يالشيخ انا نقول لك...شوف سقسينا برك هذا الايرلندي إذا كان جايب معاه حاجة كلاس.
لم أكن لأفهم مقصده لو أن الذي قالها لم يكن ذلك العنابي المتعجرف. فهمت انهم يسألون إن كان لدى الإرلندي خمرا فاخرا.
-- حاجة كيما الريكارد ولا الباستيس ولا سكريمنج كاب.
-- على بالكم هذاالسيد واش جابه للجزاير؟
-- راه حواس يالشيخ..واش رايح يجيبه؟
-- هذاراه يحوس على الحقيقة..هذا راه يحوس على دين يؤمن به..قالوا له ان الجزائريين و الأفارقة جنوب الجزائر هم احسن الناس تطبيقا للاسلام و انتم جايين تفسدوا هذه الصورة.
-- وين تعرفه انت؟
-- حكيت معه ...هذا قال لي أن التدخين أكبر غلطة ارتكبها في حياته و انت جاي تسقسيه على الخمر ...والله عيب عليكم.
-- و علاش عيب ..هاك أنت تتكيف يالشيخ...والله كي شفناك بالدخان قلنا الشيخ تاني يديرها.
-- لا حول ولا قوة بالله...انا ثاني هذه غلطة عمري...من الأخر...السيد خاطيه و عنده خمس سنين ما شربش و ما يشربش.
-- الله غالب ...بلانا ربي يالشيخ..ها راك تشوف واش صاري..راك تعرف الميليتار ياشيخ..المشاكل و الضغوطات...رانا خارجين في مهمة في الربع الخالي هذا ثلاث أيام و احنا في الخلاء...واش تحبنا نديروا؟
-- يعني كي تشرب رايح تولي سيفيل -مدنيين- او تتحل مشاكلكم..
--هاك انت تتكيف يالشيخ. على بالك حرام
-- هه..شكون قالك؟هل يذهب العقل؟
--يهلك الصحة..
--شوف يا اخي..أنا أعرف أن الخمر حرام و متأكد من ذلك. الدخان مضر و شخصيا لا أحبه..أدعو الله يهدينا و يهديكم. 
--آمين..خسارة ما نعرفوش الانجليزية..والله كنت نقراها مليح فالمتوسطة جابولنا واحد في الثانوية مايقريش مليح..كان يجي يعمر لنا السبورة و يحل التمارين اللي في الكتاب و يروح.
-- ما زالك صغير الله يبارك. تقدر تتعلمها ..ساهلة
--والله ماذا بيا ياأستاذ..والله لو كان جيت في تمنراست نجي لعندك تعلمني و نخلصك..والله الشي اللي تطلب...والله كي نشوف واحد يتكلم الانجليزية مع السياح نغير .
-- قابل..بصح نخاف نسوفجك
-- آه ياأستاذ..كيفاش تسوفجني...رايح نولي نتكيف؟...لا ..ما نحبش الدخان.
--هههه..ما نقصدش الدخان. يعني نعلمك تتكلم الانجليزية تولي قادر تروح للاروبيين و تسقسيهم مباشرة على الشراب.
--ههه...والله والو يا أستاذ. ربي يتوب علينا...والله حشمتني..والله حاب نتعلمها...وزيد يا أستاذ...قل لي من تعاشر أقول لك من أنت...والله قبل ما نجي لتمنراست ما كنت نشرب... خالطت جماعة علموني.
-- صح..رايح نريح في تمنراست 15 يوم ..إذا حبيت ارواح ...أسبوع نقدر نعطيك حوايج في الانجليزية تقدر تكمل بيهم وحدك.