الترقي لا يتيه

  واصلنا السيرفي وسط تضاريس من أغرب ما يرى الناظر فكثبان رملية على مد البصر تارة او جبال صخرية سوداء تارة أخرى او مزيج بينهما. الشيء الأكيد ان الحياة لا أثر لها هنا. كنت اعتقد ذلك قبل أن تكذبني تلك القطعان من الغزلان التي ظهرت فجأة امام السيارة. أخذت الغزلان تجري مذعورة و كأنها شعرت بأن السائق يطاردها بسيارته في منظر لم أشاهده إلا في تلك الاشرطة الوثائقية التي كانت تصور في أفريقيا. كان عددها كبيرا لكن  كان بامكاني عدها بعد أن استمرت في الركض امام السيارة و بجانبها. المنظر أعجبني و هنا تدخل السائق حميدة.
-- تعرف يالشيخ وحد البنة فيها ما تقد تتصورها. 
-- موالف تصيدها؟
-- إيه يالشيخ ...والله ما يفوت شهر بلا ما نصيد وحدة...أحنا التوارق نعرف وين نلقاوها و نعرف نصيدوها بسهولة. مشوية على الرمل ما تلقاش كيفها. يديروها في عين صالح بصح باللحم غنمي
-- سمعتهم مرة يحكيوا على ملة
-- إيه ...هي بالضبط كسرة محشية باللحم المتبل تطيب تحت الرمل.
-- هذا دليل على أن الحياة موجودة هنا يا حميدة... ما شفت حتى شجرة و الا حشيش أخضر او يابس هنا .. ومنين تعيش هذه الغزلان؟
-- ربي رزاق عظيم الشان سبحانه..لوكان تتوغل في الضحراء تشوف العجب...بين هذه  الجبال و الصخور و العروق كاين بحيرات و حشيش و دنيا قايمة.
-- عمرك تهت في الصحراء.
-- هههه....آه يا شيخ....تقول على واحد ترقي تاه في الصحراء يضحكوا عليك هنا. أنت من جيجل ياك؟ تقدر تقول على واحد عايش في الجبل ضيع الطريق و تاه في الجبل؟
-- ماشي كيف كيف...تمة حتى إذا ضاع مايموتش بالعطش او السخانة.
-- إيه..كاينة ..انا نحكي على الخبرة...آني نعرفها يالشيخ...حكمة خلاوها الجدود ..اول شيء يحافظ عليه الترقي هو الماء و الحليب..و هما في زوج من السوائل. على هذيك المثل عندنا يقول ''امان ايمان اخ ايسودار'' و يعني  الماء هو الحياة و الحليب هو القوت او الزاد
-- عاود المثل هذا آحميدة ربي يحفظك
--امان ايمان اخ ايسودار..ساهل 
--امان ايمان اخ ايسودار...خلاص حفظته..و لوكان تصرا و تضيع فالصحراء واش تدير؟
-- إذا كنت في الصحراء و فقت باللي تهت اول حاجة تحبس المشي. ما تزيدش خطوة .اترك السيارة و ارجع تبع أثار العجلات. ما تجريش. الماء دايما معاك. ما تشربش الماء...غير حط شوية في فمك و ابق دوّر لسانك فيه. غطي روحك من الشمس باش ما تعرقش . أمش وما تطلعش الكثبان الرملية او الصخور باش ما تفقدش الطاقة...إذا لقيت آثار ماشية ماعز و الا غنم و الا بعير تبعها...هذا ماكان.
-- كاين اللي تاهوا ولقيتهم, جزايرين  ؟ سياح أجانب؟
-- إيه ..صرات ...بالصح ماشي ياسر...الاوروبيين  عندهم الماتريال ...الخرائط و البوصلة و الراديو ..تعلموا..رجعوا يمشوا مجموعات و يكروا دليل ينعتلهم الطريق...عندهم الدوفيز... المغابن هاذوا السوادين.
-- واش بيهم؟
-- هاذوا ما عندهمش مساكن...يبدلوا طريق النظام باش يهربوا من حرس الحدود و على بيها يتيهوا
--كاين اللي ماتوا؟
-- ياسر ...اشحال من واحد لقينا غير عظامه مسكين. و نزيدك حاجة..
-- تفضل
-- هاذو اللي جايين من اروبا بلادهم تحوس عليهم و تجري عليهم ..سقسي على هاذوا السوادين مساكن والله واحد ما عارف ليهم قاع... تعرف الشيخ..كاين ابن تاتشر هاذي ...الوزيرة الاولى تاع النجليز...هذا بنها تاه في الصحراء بين تيمياوين و تيىزاواتين 5 أيام. دارت حالة عليه...يحكي لي أبّا ان الدولة تاعنا خدّمت الطوارق كامل باش يلقاوه .
-- و لقاوه؟
-- إيّه...الحكومة قالت  الجدارمية لقاوه بعد 5 أيام  حي ..شافوه من هليكوبتر...و أبّا قال ليا هما اللي لقاوه و خبروا الحكومة.      
    استمتعت كثيرا بحديث هذا السائق على أنغام علة البشاري. هي لحظات وتوقفت السيارة أمام بيت من طوب قال لنا السائق أنه محل تجاري .من أراد ان يتزود بالطعام او الشراب فلينزل. آي آي..شعرت و أن ركبتاي لن تحملاني مرة ثانية من كثرة الجلوس. نزل الجميع. توجهت مع الايرلندي الى ما قيل أنه محل اما البقية فمنهم من أشعل سيجارة و منهم من جلس ينتظر على الأرض. مرحبا بكم في ''آراك''.